Ang Lamborghini ay naglabas ng bagong race car na tinatawag na Temerario GT3, ang kauna-unahang GT3 model na gawa, dinisenyo, at binuo mismo sa Sant’Agata Bolognese, Italy. Base ito sa bagong road car na Temerario pero ginawa para sa matinding karera.
May carbon-composite body ang bagong GT3 na sobrang gaan at may aluminum spaceframe chassis para mas mabilis ang ayos tuwing pit stop. Naka-install din dito ang isang bagong version ng 4.0L twin-turbo V8 engine na may 550 hp, kasabay ng 6-speed sequential gearbox, na akma sa GT3 racing rules.
Binuo rin ang aerodynamics nito para sa mas maayos na daloy ng hangin at mas maginhawang paglamig ng makina. Kasama sa upgrade ang exhaust system mula sa Capristo na nagbibigay ng mas matinding performance.
Sa loob, inayos ang cockpit base sa payo ng Lamborghini race drivers. May bagong steering wheel, electronic system, at mas magandang driver ergonomics. Nilagyan din ito ng 6-way KW dampers, mas mahabang wheelbase, mas malapad na gulong, at hydraulic steering para mas mahusay ang kontrol sa bawat liko.
Inaasahan ang debut ng Temerario GT3 sa 2026 Sebring 12 Hours race. Patunay ito ng patuloy na suporta ng Lamborghini sa GT racing at sa kanilang mga customer racing teams.
