Ang isang 61-anyos na lalaki na senior citizen ay nahuli matapos magnakaw ng P80,000 mula sa kapwa senior citizen sa loob ng jeep sa Quiapo, Manila. Nangyari ang insidente noong July 9, bandang alas-10 ng umaga habang nasa biyahe ang jeep sa Barangay 659-A, Ermita.
Ayon kay Lt. Col. Alfonso Saligumba III, hepe ng Police Station 5, nawalan ng pera ang biktimang 79-anyos na lalaki matapos bumaba sa Carriedo Street. Nasa loob ng isang plastic bag ang pera at nakalagay sa kanyang bulsa. Mabuti na lang, may isang pasahero na nakakita sa aktong pagkuha ng pera at tumulong sa biktima na mag-report sa pulis.
Sa CCTV footage, makikita ang suspek na sumakay ng jeep kasama ang biktima. Sa ibang video, nakita rin siyang nagmamadaling lumalakad at sumakay ng e-trike. Natunton siya ng pulisya sa isang mall sa Quiapo kinabukasan, July 10. Hindi pa siya nagpapalit ng suot at nakuha sa kanya ang purse o supot ng biktima.
Sa halip na P80,000, P40,500 na lang ang narecover. Ayon sa suspek, nagamit na niya ang pera sa groceries at pambayad ng utang. Humingi siya ng tawad sa kanyang ginawa. Inamin niya ang krimen at sinabing gipit lang siya sa pera.
May naunang kaso na rin ng pagnanakaw ang suspek, at ngayon ay nahaharap muli sa reklamong theft at illegal possession ng kutsilyo.
