Ang isang 14-anyos na binatilyo ay namatay matapos barilin ng kanyang 16-anyos na kaibigan sa sementeryo sa Tuktukan, Taguig City noong gabi ng Hunyo 24. Ayon sa CCTV, kasama ng biktima ang ilang kabataan sa bubong ng isang mausoleum bago ito biglang mahulog at bumagsak sa kalsada.
Ayon sa mga barangay tanod, buhay pa ang biktima nang matagpuan at agad dinala sa ospital, pero binawian ng buhay kinabukasan ng madaling araw. Isang residente, si Russel Mahusay, ay nakarinig ng tatlo hanggang apat na putok ng baril malapit sa isang computer shop.
Sa paunang imbestigasyon, apat na lalaki ang unang pinaghinalaan. Pero sa follow-up operation, natukoy ang 16-anyos na suspek at kusang sumuko kinabukasan sa tulong ng kanyang ama. Umamin ito na siya ang bumaril, dala raw ng kuryosidad habang hawak ang baril.
Ayon sa salaysay ng suspek, naglaro siya ng baril habang nasa bubong ng mausoleum. Nang aksidenteng nalabit ang gatilyo, natamaan ang biktima. Dahil sa takot, itinapon niya ang baril at agad tumakas pauwi sa Bagong Silang.
Napag-alamang dati na rin silang nasangkot sa carnapping at pagnanakaw. Patuloy ang imbestigasyon ng mga awtoridad sa insidente.
