Ang mag-asawang sina Ronald at Shielan Criscel Rivera ay nahuli sa Calintaan, Occidental Mindoro dahil sa pagkakasangkot sa isang malaking investment scam na umabot sa P5 bilyon. Kasama nila ang sekretarya nilang si Apply Joy Templo, na una nang nahuli sa Balayan, Batangas. May arrest warrant ang tatlo dahil sa syndicated estafa.
Ayon kay Maj. Charlie Reyes ng Cuenca Police, matagal nang mino-monitor ang mag-asawa matapos lumabas ang warrant. Sa kabila ng mga reklamo, nakapagtayo pa sila ng batching plant sa Mindoro na ginagamit rin umano bilang opisina sa araw. Sinimulan umano nila ang operasyon noong 2021 at nag-alok ng investments sa negosyo ng aggregates at batching plant.
Maraming negosyante, ordinaryong mamamayan, at isang konsehal mula sa Batangas, Metro Manila, at Hilagang Luzon ang nabiktima. Pinangakuan silang madodoble agad ang kita — halimbawa, P500K investment ay babalik ng P800K to P1M sa loob lamang ng ilang araw. Pero matapos ang ilang transaksyon, hindi na naibalik ang puhunan at tumalbog na ang mga tseke.
Ayon sa abogado ng mga biktima, nagpakita ng mga pekeng dokumento ang mga suspek tulad ng purchase orders para mapaniwala ang mga tao na lehitimo ang negosyo. Sa ngayon, tatlong kamag-anak ng mag-asawa ang pinaghahanap pa ng mga pulis. Walang piyansa ang ipinagkaloob para sa kanilang pansamantalang kalayaan.
