Ang mga abogado mula sa Davao City ay nagbabala na ang anumang petisyon sa Korte Suprema kaugnay ng impeachment trial ni Vice President Sara Duterte ay maaaring gamitin para patagalin ang proseso. Ayon kay Atty. Joel Mahinay ng Union of Peoples’ Lawyers in Mindanao (UPLM), ito ay isang "patibong" na layunin lang ay ang i-delay ang paglilitis upang mapagod ang publiko at makalimutan ang isyu pagdating ng eleksyon sa 2028.
Sinabi ni Atty. Arvin Dexter Lopoz, tagapagsalita ng UPLM, na mas mainam kung ibabalik ng House of Representatives sa Senado ang mga artikulo ng impeachment upang mapilitan ang mga senador na ituloy ang trial. Aniya, ang pagsasampa ng kaso sa SC ay magdudulot lang ng karagdagang delay at maaaring gamiting legal na dahilan para iwasan ang pagharap sa mga paratang.
Paliwanag ni Atty. Romeo Cabarde Jr. ng Ateneo Public Interest and Legal Advocacy, kahit walang malinaw na basehan sa Konstitusyon ang hakbang ng Senado, mas mainam munang gamitin ang public pressure kaysa legal na aksyon agad. Posibleng magamit ang delay sa SC bilang taktika ng kampo ni VP Sara upang iwasan ang pananagutan.
Isa sa pinakainaabangang bahagi ng impeachment ay ang isyu ng P2.2-bilyong bank account umano ni VP Sara at dating Pangulong Duterte sa BPI Julia Vargas. Ayon kay Lopoz, ang perang ito ay hindi nakita sa kanilang SALN at kapag ito ay napag-usapan sa trial, ito ay magbibigay linaw sa alegasyon ng hindi maipaliwanag na yaman.
Sa kasalukuyan, tinalakay din ng Office of the Solicitor General (OSG) na walang nangyaring railroading sa impeachment process. Ayon sa kanila, 215 mambabatas ang kusang lumagda sa ika-apat na complaint, kaya legal ito base sa Konstitusyon. Anila, mali ang pagkaintindi ng mga petitioners sa proseso ng impeachment.
