Ang Department of Foreign Affairs (DFA) ay nagkumpirma na apat na Pilipino ang nasugatan at naospital sa Israel matapos ang pag-atake ng Iran gamit ang missile at drone. Nasa lungsod sila ng Rehovot, mga 20 kilometro mula sa Tel Aviv, nang tamaan ng airstrike noong weekend.
Tinatayang 30,000 OFWs sa Israel at Iran ang pinayuhang mag-ingat habang umiinit ang tensyon sa pagitan ng dalawang bansa. Nagpaputok ng missile ang Iran papunta sa Tel Aviv at Jerusalem bilang ganti sa naunang pag-atake ng Israel sa mga pasilidad ng Iran.
Ayon kay migration expert Manny Geslani, karamihan sa mga Pilipino sa Israel ay caregivers, habang ang mga nasa Iraq ay nagtatrabaho sa mga kumpanya at pabrika. Dapat umano ay alam nila kung saan ang pinakamalapit na bomb shelter at pamilyar sa air raid sirens.
Nanawagan din si Geslani sa gobyerno ng Pilipinas na bigyan ng proteksyon ang mga Pinoy sa US bases sa Iraq, na mas nanganganib kung titindi pa ang mga pag-atake ng Iran.
Naka-alerto na ang Department of Migrant Workers (DMW) para tumulong sa mga OFW sa Middle East. Pinapaalalahanan ang mga Pilipino roon na tumawag sa DMW hotlines kung kinakailangan ng tulong.
