Ang ebidensya laban kay dating Pangulong Rodrigo Duterte ay sapat, ayon kay Kristina Conti, isa sa mga abogado ng mga pamilya ng biktima sa ICC. Nilinaw niyang ang pag-anyaya sa iba pang posibleng biktima ng drug war na makilahok ay hindi dahil kulang ang testigo o ebidensya.
“Patuloy ang imbestigasyon sa Pilipinas at may sapat na ebidensya,” sabi ni Conti. Aniya, bukas pa hanggang Agosto 3, 2025 ang aplikasyon ng mga biktima na nais lumahok sa proseso ng ICC.
Ipinunto rin ni Conti na magkaiba ang biktima bilang testigo at ang biktima bilang kalahok sa proseso. Sa ilalim ng patakaran ng ICC, puwedeng makilahok ang mga biktima para ipahayag ang kanilang saloobin at hiling, kahit hindi sila testigo.
Sa kasalukuyan, ang mga biktima ay kinakatawan ng Office of Public Counsel for the Victims habang naghahanap pa ng iisang legal na kinatawan para sa kanila.
Si Duterte ay nananatiling naka-detain sa The Hague matapos siyang arestuhin noong Marso ngayong taon.
