Ang tensyon ay uminit sa Senado bago pa man magsimula ang impeachment proceedings laban kay Vice President Sara Duterte. Sina Senador Robin Padilla at Joel Villanueva ay muntik nang magkasalpukan matapos tutulan ni Villanueva ang mosyon ni Sen. Bato Dela Rosa.
Sa isang video, makikitang hinila ni Dela Rosa si Padilla palayo habang pinipigilan naman ni Sen. Nancy Binay si Villanueva. Maririnig si Padilla na nagsabing, “Oh ano?”, habang si Sen. Alan Peter Cayetano ay sinubukang payapain ang lahat, sabay sabing, “Misunderstanding lang.”
Ang pinagmulan ng tensyon ay ang pagtutol ni Villanueva sa mosyon ni Dela Rosa na ibasura ang impeachment complaint laban kay VP Duterte. Ayon kay Dela Rosa, may mga “constitutional infirmities” at isyu sa hurisdiksyon kaya’t dapat na itong itigil.
Kasama ni Villanueva sa pagtutol sina Sen. Risa Hontiveros at iba pang senador. Sa kabila nito, nagpahayag ang Senado ng pormal na pagsisimula ng impeachment at nagsuot ng mga crimson robe ang mga senator-judges.
Ngunit kapansin-pansin, hindi nagsuot ng robe ang mga kilalang kaalyado ni Duterte gaya nina Padilla, Sen. Cynthia Villar, at Sen. Imee Marcos sa nasabing pagdinig.
