Ang tatlong magpipinsan at ang babaeng live-in partner ng isa sa kanila ay naaresto matapos silang isangkot sa isang holdup sa isang junkshop sa Barangay Bahay Toro, Quezon City. Ayon sa QCPD, madaling araw noong Hunyo 6, pinasok ng mga armadong suspek ang junkshop sa Congressional Avenue, tinutukan ng baril ang may-ari, at tinangay ang P30,000 kita pati ang apat na cellphone ng mga biktima.
Agad na kumilos ang mga pulis at bumuo ng Special Investigation Team na siyang nangalap ng CCTV footage. Sa tulong nito, nasundan ang galaw ng mga suspek hanggang sa sila ay madakip sa Bagong Barrio, Caloocan noong Sabado. Kinilala ang mga suspek na sina alias “Mark Anthony,” “Mark Acevin,” “Mark Eugene,” at si “Renquel.” Nakuha mula sa kanila ang iba't ibang klase ng baril, bala, sumpak, at ang motorsiklong ginamit sa pagtakas.
Lumalabas din na may mga kasong robbery, carnapping, at droga na dati nang kinakaharap ang ilan sa kanila. Sa ngayon, nakadetine na sila sa CIDU Camp Karingal at sinampahan ng mga kasong robbery, paglabag sa Motorcycle Crime Prevention Act, Firearms Law, at Omnibus Election Code.
