Ang aktres na si Karen Lopez, 21-anyos at rising star ng Vivamax, ay anim na araw nang nawawala. Huling nakita si Karen noong Mayo 5, bandang alas-12 ng tanghali, sa kanyang condo unit sa Quezon City. Ayon sa talent manager na si Lito de Guzman, sinundo siya ng kanyang nobyo, at mula noon ay wala nang balita sa kanila.
Ayon pa sa ulat ng QCPD, ini-report na ng ina ni Karen ang kanyang pagkawala. Wala na ring komunikasyon si Karen sa kanyang mga kaibigan at manager. Hindi na siya ma-contact sa Messenger, Viber, at WhatsApp, kaya’t labis na nag-aalala ang kanyang team.
Sa kabila nito, nagpapatuloy ang shoot ng pelikulang "Maalikaya" sa Antipolo City, na unang pelikula sana ni Karen. Ayon sa direktor na si Roman Perez Jr., sinubukan niyang baguhin ang script dahil sa pagkawala ni Karen. Inaasahan pa sana siyang darating noong Mayo 7, alas-6 ng umaga, pero hindi siya nagpakita.
Ayon sa CCTV footage, totoo ngang sinundo siya ng kanyang nobyo, na kinumpirma rin ng security guard. May hinala ang direktor na maaaring may kinalaman ang nobyo sa kanyang pagkawala, dahil ayaw umano nitong mag-VMX si Karen.
Labis ang pag-aalala ng mga taong malapit kay Karen, lalo na’t kilala siya bilang maayos kausap at hindi palalampas ng trabaho. Umaasa silang ligtas si Karen at lalabas rin siya sa lalong madaling panahon.
