Ang KTM ay naglabas ng worldwide recall kaugnay ng mahina at posibleng masirang sidestand spring, matapos iulat ng maraming may-ari ang biglaang pagpatay ng makina habang ginagamit ang motorsiklo, lalo na sa rough terrain at adventure rides. Ang problema ay konektado sa sidestand switch na maaaring mag-activate ng safety kill switch kapag bahagyang bumaba ang sidestand.
Ayon sa KTM, natuklasan sa kanilang quality inspections na ang engine vibrations ay maaaring maging sanhi ng pagkabasag ng sidestand spring. Saklaw ng recall ang 2025 hanggang 2026 KTM 390 models. Inutusan ang mga apektadong may-ari na magtungo sa authorized KTM dealer para sa libreng pagpapalit ng sidestand spring at paglalagay ng rubber protection.
Habang hinihintay ang pag-aayos, pinayuhan ng KTM ang mga customer na pansamantalang i-secure ang sidestand gamit ang rubber band o katulad na pansuporta. Kasama rin sa service visit ang pag-install ng bagong sidestand sensor retaining plate, na nag-aayos sa trigger range ng sidestand switch upang maiwasan ang hindi inaasahang pag-off ng makina.
Sa Pilipinas, matagal nang nirerekomenda sa ilang may-ari ang software update para bawasan ang sensitivity ng system, o kaya’y ang paggamit ng aftermarket sidestand switch bypass kit na karaniwang nagkakahalaga ng humigit-kumulang USD 12 + shipping. Gayunman, opisyal na solusyon na ngayon ang recall na inilunsad ng KTM.
Samantala, wala pa ring opisyal na anunsyo mula sa KTM Austria kung sino ang magiging bagong KTM PH distributor, kahit may usap-usapang maaaring pumalit ang Trimotors Philippines mula sa Lucky MAPI. Ayon kay Sarah Parzer, Senior Integrated Communication Manager ng KTM, maaari pa ring dalhin ng mga Filipino customers ang kanilang mga apektadong motorsiklo sa pinakamalapit na authorized KTM o Husqvarna dealers para sa kinakailangang serbisyo.
