Ang Department of Education (DepEd) ay nag-apruba ng P131 milyon para sa 131 paaralan na nakakuha ng negative results sa 2024-2025 literacy assessment. Ayon sa EDCOM 2, 85% ng Grades 1-3 learners ay hirap magbasa, lalo na sa mga paaralan sa Regions 12, 9 at 8. Sabi ni Karol Mark Yee, kailangan ng books, teacher training at suporta ng community para matugunan ang lumalalang learning crisis.
Nagbabala rin ang EDCOM 2 na ang functional illiteracy sa bansa ay halos dumoble sa 24.8 milyon sa nakalipas na 30 taon. Ipinakita rin ng UNICEF na malala ang atrasadong learning levels ng mga estudyante, lalo na sa reading at math. Kaya giit ng mga eksperto, dapat mas palakasin ang learning resources at teacher development.
Samantala, iniulat ng DepEd na tumaas ng 289% ang textbook procurement matapos ang halos isang dekadang mabagal na pag-deliver ng mga libro. Mula 27 titles noong 2012-2023, umabot ito sa 105 titles sa loob ng isang taon. Sa 2026 budget, P29.16B ang inilaan para sa 103.9M learning materials, ang pinakamalaki sa mga nakaraang taon.
Upang mas mapabilis ang proseso, ipinatutupad na ng DepEd ang RA 12009 at DepEd Order 8 na nagre-require na screening muna bago bidding, para masigurong complete, correct, and timely ang mga librong darating. Target ng DepEd na makumpleto ang quality assurance ng 176 textbooks, 360 exemplars, at higit 3,000 learning resource titles sa 2026. Bumili na rin sila ng educational toys para sa Kindergarten.
Nagpahayag din ng suporta ang DepEd senior officials kay Secretary Sonny Angara sa gitna ng mga isyung ibinabato sa kanya. Giit nila, nakita nila ang kanyang integrity, transparency at reform efforts para gawing mas maayos at mas responsable ang sistema ng edukasyon. Sinabi nilang walang matibay na link ang DepEd sa mga alegasyong kumakalat at nananatili silang buo ang tiwala sa pamumuno ni Angara.
