Ang Illest Morena ay magkakaroon ng charity show ngayong buwan para makatulong sa mga pamilyang apektado ng bagyong Tino at Uwan sa Cebu.
Inanunsyo ng singer noong Nobyembre 13, 2025 na gaganapin ang mini concert na “Morena Unplugged” sa Nobyembre 26, 2025 sa The Astbury sa Poblacion, Makati City. Lahat ng kita mula sa event ay ibibigay sa mga Cebu families na tinamaan ng mga nagdaang bagyo.
Sinabi rin ni Illest Morena na bilang isang Cebuana, gusto niyang magbigay ng tulong sa kanyang kababayan. Magpe-perform siya kasama ang live band kaya aasahan ng mga manonood ang mas personal at stripped-down na vibe.
Ang ticket price para sa Morena Unplugged ay ₱1,500 at available sa pamamagitan ng online registration. Inaanyayahan niya ang fans na sumuporta para makalikom ng pondo para sa Cebu.
Kamakailan, lumabas din si Illest Morena sa kantang “tayo lang (may alam)” kasama sina Janine Berdin at Fana. Sumunod ito sa iba pa niyang collab singles tulad ng “Pakita Mo Sa Akin” at “The Baddest.”
