Ang dating Bamban mayor na si Alice Guo at pitong kasama niya ay hinatulan ng habambuhay na pagkakakulong dahil sa qualified trafficking, ayon sa Pasig Regional Trial Court Branch 167. Idineklara rin ng korte na ang Baofu compound sa Bamban, Tarlac na nagkakahalaga ng P6 bilyon ay mapupunta na sa gobyerno.
Ayon sa ruling, sina Guo, Jaimielyn Santos Cruz, Rachelle Malonzo Carreon at Walter Wong Rong ay napatunayang nag-organisa ng human trafficking sa loob ng Baofu compound. Ang mga Chinese nationals na sina Wang Weili, Wuli Dong, Nong Ding Chang at Lang Xu Po ay nahatulan naman dahil sa aktwal na pag-traffick. Bawat isa ay may parusang habambuhay na kulong at multang P2 milyon kada kaso.
Ayon sa PAOCC executive director Benjamin Acorda Jr., ang hatol ay patunay ng malakas na pagtutulungan ng mga ahensya at mga nagreklamo. Sinabi niyang ang kaso ay nagsimula lamang sa sumbong ng isang empleyado, na nagpakita kung gaano kalaki ang nagagawa kapag nagkakaisa ang komunidad at pamahalaan.
Kinumpirma naman ng Assistant State Prosecutor Olivia Torrevillas na walo ang nahatulan at ito ang unang hatol sa ilalim ng Section 4(l) ng Anti-Human Trafficking Law para sa organizing trafficking. Ang kaso ay nagmula sa raid ng PNP at PAOCC sa POGO operator na Zun Yuan Technology, na nangungupahan sa compound ni Guo.
Maraming opisyal ang pumuri sa desisyon, kabilang sina Senators Risa Hontiveros at Sherwin Gatchalian, na nagsabing ang hatol ay tagumpay laban sa korapsyon, human trafficking, at POGO-related crimes. Dagdag pa ni Rep. Leila de Lima, ang desisyon ay nagbibigay hustisya sa mga biktima at dapat magsilbing babala sa mga negosyong ginagamit bilang takip sa ilegal na gawain.
