Ang hinihinalang debris ng Chinese rocket ay natagpuan sa baybayin ng Camiguin Island sa Calayan, Cagayan, ayon sa ulat ng Philippine Coast Guard (PCG). Ang natagpuang metalikong bagay ay agad iniulat ng isang residente habang siya ay naglalakad papuntang Sitio Morol.
Matapos matanggap ang impormasyon, agad kumilos ang PCG Calayan kasama ang mga opisyal ng barangay, pulisya, at Municipal Disaster Risk Reduction and Management Office (MDRRMO) upang tiyakin ang kaligtasan ng lugar. Sinuri nila ang debris na natagpuan sa pagitan ng Sitio Nambaca, Sitio Bibigsan, at Sitio Dakel A Danum.
Inatasan ng Coast Guard District North Eastern Luzon ang kanilang CBRNE team (Chemical, Biological, Radiological, Nuclear, and Explosive) na pangasiwaan ang debris upang masiguro na walang panganib sa kalusugan o kapaligiran.
Pinayuhan ang mga mangingisda at residente na huwag lumapit o kumuha ng anumang bahagi ng debris habang nagpapatuloy ang imbestigasyon. Mahigpit na pinag-iingat ang lahat upang maiwasan ang posibleng exposure sa kemikal o biohazard.
Ayon sa PCG, patuloy ang kanilang pagsubaybay at maglalabas sila ng opisyal na ulat kapag tapos na ang pagsusuri.
