Ang kaguluhan sa Ninoy Aquino International Airport (NAIA) Terminal 1 nitong Huwebes ng gabi ay nagresulta sa pagkasugat ng limang security guards matapos umatake ang isang Cameroonian teenager gamit ang upuan at sinturon.
Ayon sa ulat ng NAIA PNP-Aviation Security Group, ilang beses nang pinagsabihan si Floriant Ndzeng Atangana, 18-anyos, na huwag magpalipat-lipat sa holding area. Ngunit naging agresibo siya at sinaktan ang mga guwardiya habang sumisigaw ng masasamang salita.
Nakilala ang mga sugatang guwardiya na sina Roderick Pagulayan, Leofel Niño Laurilla, Christopher Naparate, Nursiya Narawi, at Katrina Mae Riel. Agad silang binigyan ng lunas ng medic team matapos pakalmahin ni security head Jio de Castro ang sitwasyon.
Ayon sa pulisya, hindi pa desidido ang mga guwardiya kung magsasampa sila ng kaso laban kay Atangana, na idineklarang “inadmissible person” ng Bureau of Immigration (BI).
Samantala, dalawang Pilipino ang hinarang ng BI sa NAIA Terminal 3 matapos mapag-alamang biktima ng human trafficking. Ang mga ito, edad 25 at 37, ay papunta sana sa Cambodia at may dalang pekeng employment documents. Ayon sa imbestigasyon, pinilit ng isa sa kanila na tumuloy matapos pagbantaan ng recruiter na mapaparusahan ang kaibigan nito sa abroad.
Sinabi ni Immigration Commissioner Joel Anthony Viado na patuloy ang mga sindikato sa paggamit ng emosyonal na pang-aabuso upang mapasunod ang mga Pilipino. Dagdag niya, “Walang puso ang mga traffickers. Inaabuso nila ang takot at relasyon ng kanilang mga biktima.”
Sa parehong araw, inaresto rin ng BI ang isang Norwegian na si Maryath Stig Ljunggren, na may kasong sekswal na pang-aabuso sa mga bata sa Oslo. Siya ay may Interpol Red Notice at pinagbabawalan nang makapasok sa bansa.
