Ang isang kapitan ng pulis ay nasawi habang isa pang pulis ang nasugatan matapos pagbabarilin ng mga suspek sa Barangay Sudlon 2, Cebu City nitong Sabado. Naganap ang insidente habang nagsasagawa ng surveillance operation laban sa isang gun-for-hire group.
Ayon sa ulat ng PNP-CIDG, minamanmanan ng mga operatiba ang galaw ng sasakyan ng mga suspek nang biglang huminto ito at pinaputukan sila ng high-powered firearm. Dahil dito, nasawi si Police Captain Joel Hernan Deiparine, habang nagtamo ng minor injuries si Police Executive Master Sergeant Artchel Tero.
Sinabi ni Police Major Helen Dela Cruz, tagapagsalita ng CIDG, na tila napansin ng mga suspek na may sumusunod sa kanila kaya sila biglang huminto at nagpaputok. Mariing kinondena ng CIDG ang malupit na pag-atake at binigyang-diin ang panganib na hinaharap ng mga pulis sa kanilang tungkulin.
Nagpapatuloy ngayon ang manhunt operation para sa mga suspek. Nag-alok ng ₱500,000 pabuya ang Cebu City government, Police Regional Office 7, at isang anonymous donor para sa impormasyong magtuturo sa mga salarin.
Ginawaran si Captain Deiparine ng Medalya ng Kadakilaan bilang pagkilala sa kanyang tapang at dedikasyon sa tungkulin. Nangako ang CIDG na kanilang huhulihin ang mga suspek at ipaglalaban ang hustisya para sa kanilang kasamahan.
