Ang Dubai chocolate ay kilala sa milky chocolate sa labas, pistachio cream sa loob, at malutong na kadayif. Popular ito dahil sa social media, na nagbigay ng bagong food trend sa buong mundo. Sa halagang ₱480 bawat 100 gramo, naging uso na rin ang homemade recipes nito.
Ngunit may kaakibat na problema. Tumaas ang demand sa pistachios kaya maraming bansa ang nagpalawak ng taniman. Sa Spain, limang beses na lumaki ang taniman mula 2017. Kailangan ng higit 10,000 litro ng tubig para makagawa ng 1 kilo ng pistachios, na nagdudulot ng kakulangan sa tubig sa ilang lugar.
Pati matcha mula Japan ay naapektuhan ng sobrang demand. Dati ito ginagamit sa tradisyonal na seremonya, ngayon ginagawang superfood tulad ng matcha latte at chocolate. Tumaas ang presyo, at nagkakaroon ng kakulangan sa supply, lalo na para sa lokal na merkado.
Quinoa sa Andes, Peru at Bolivia, nagdulot din ng problema. Mataas ang presyo kaya hindi na afford ng lokal ang kanilang sariling pagkain. Napilitang paikliin ng mga magsasaka ang panahon ng pagtatanim, na nagdulot ng labis na paggamit ng kemikal at pagkaubos ng lupa.
Upang maiwasan ang epekto ng food trend, dapat magtanim hindi lang para sa global market kundi para sa lokal din. Mas mainam ang halo-halong taniman kaysa monoculture. Mahalaga rin na responsable ang nagpo-promote ng mga bagong pagkain sa epekto nito sa kalikasan at lokal na komunidad.
