Ang MMDA ay handa na sa paggunita ng Undas 2025 upang masiguro ang maayos na daloy ng trapiko at ligtas na pagbiyahe ng mga motorista at commuter. Ayon kay MMDA Chairman Romando Artes, mahigit 2,400 field personnel ang magtatrabaho hanggang hatinggabi. Ipatutupad din ang “no absent, no day-off” policy sa lahat ng tauhan.
Magkakaroon ng mga traffic management plan para tulungan ang mga motorista patungo sa mga terminal. Isasailalim din sa random drug testing ang mga driver ng bus upang mapanatili ang kaligtasan ng lahat ng biyahero.
Makikipagpulong ang MMDA sa pamunuan ng North Luzon Expressway (NLEX) at South Luzon Expressway (SLEX) upang maiwasan ang trapik sa mga lalabas ng Metro Manila. Layunin nito na mapabilis ang biyahe lalo na sa mga uuwi sa probinsya.
Samantala, nagpaalala ang Manila City Government sa mga pupunta sa Manila North Cemetery sa Sta. Cruz at Manila South Cemetery sa Makati. Bukas ang Manila North Cemetery mula Oktubre 29 hanggang Nobyembre 2, 5 a.m. hanggang 9 p.m. Parehong oras din sa Manila South Cemetery mula Oktubre 31 hanggang Nobyembre 2.
Ipinagbawal ang pagpasok ng mga sasakyan, kagamitan sa paglilinis, sound system, alagang hayop, alak, matutulis na bagay, sugal, at mga nasusunog na materyales sa loob ng sementeryo. Ang Undas ngayong taon ay mahaba ang weekend dahil Oktubre 31 at Nobyembre 1 ay special non-working holidays.
