Ang Team Asia ay halos sigurado na sa kanilang back-to-back Reyes Cup title matapos muling magpakitang gilas sa Day 3 ng laban sa Ninoy Aquino Stadium, Manila. Panalo sila sa dalawang laban at hawak na ang malaking lamang na 9-1 bago pumasok sa huling araw ng torneo.
Nakakuha ng unang panalo ang Team Rest of the World nang talunin nila sina Carlo Biado at Aloysius Yapp sa iskor na 5-4. Dito lumamang muna sina Feder Gorst at Skylar Woodward, ngunit nakabawi sina Biado at Yapp para itabla ang laban. Sa huli, rookie na si Moritz Neuhausen ang nagbigay ng puntos para sa World team.
Bumawi naman agad ang Team Asia sa sumunod na laban. Si Duong Quoc Huang mula Vietnam ay nagpakitang gilas matapos talunin si Woodward, 5-1. Tinawag siyang “The Martian” dahil sa kanyang halos perpektong laro na nagbigay muli ng momentum sa Asia.
Sa huling laban ng Day 3, muling nagsanib-puwersa sina Biado at Yapp para talunin sina Francisco Sanchez Ruiz at Neuhausen. Tinapos nila ang laban nang walang binigay na rack, 5-0, na nagpamalas ng kanilang pagiging kampeon.
Hawak na ngayon ng Team Asia ang 9-1 lead laban sa Team Rest of the World. Kailangan ng kalaban ng himala para makahabol at maagaw ang Reyes Cup title mula sa nagdedepensang kampeon.
