Ang Department of Foreign Affairs (DFA) ay maghahain ng diplomatic protest matapos ang insidente ng ramming at paggamit ng water cannon ng China Coast Guard laban sa mga barko ng Pilipinas sa may Pag-asa Island.
Ayon sa ulat, ilang barko ng China Coast Guard at Chinese Maritime Militia ang gumawa ng mapanganib at mapanuksong galaw laban sa tatlong barko ng Pilipinas nitong Linggo ng umaga.
Sinabi ni Commodore Jay Tarriela na ang barko ng China na may numerong 21559 ay direktang nagbomba ng tubig sa BRP Datu Pagbuaya at sinadya itong banggain pagkatapos. Nagkaroon ng kaunting sira ang barko ng BFAR ngunit walang nasaktan sa mga tripulante.
Ang mga barko ng Pilipinas ay nakadaong sa Pag-asa Island para magbigay ng proteksyon sa mga mangingisdang Pilipino bilang bahagi ng programang “Kadiwa para sa Bagong Bayaning Mangingisda.”
Giit ng Philippine Coast Guard, hindi sila matatakot o mapapaalis sa lugar. Mahalaga ang kanilang presensya sa Kalayaan Island Group para ipagtanggol ang karapatan at kabuhayan ng mga mangingisdang Pilipino.
