Ang Pangulong Ferdinand Marcos Jr. ay humiling sa Kongreso ng dagdag na emergency funds para palakasin ang Quick Response Fund (QRF) ng gobyerno matapos ang sunod-sunod na kalamidad na tumama sa bansa.
Matapos bisitahin ang Masbate na sinalanta ng Bagyong Opong at pumunta sa Cebu na tinamaan ng 6.9 magnitude na lindol, sinabi ng Pangulo na paubos na ang pondo ng mga ahensya. Kaya’t inatasan niya ang Department of Budget and Management (DBM) na agad maglabas ng pondo para tuloy-tuloy ang ayuda sa mga apektadong lugar.
Nag-anunsyo rin si Marcos ng tulong mula sa Office of the President: ₱50 milyon para sa probinsya ng Cebu, ₱20 milyon bawat isa para sa Bogo City, Sogod, at San Remigio, at tig-₱10 milyon para sa mga bayan ng Bantayan, Daanbantayan, Madridejos, Medellin, Santa Fe, Tabogon, at Tabuela. Bukod dito, may tig-₱20 milyon na ayuda para sa mga ospital ng DOH at tig-₱5 milyon para sa mga ospital ng probinsya.
Dagdag pa rito, maglalabas ang DBM ng ₱150 milyon para sa Cebu province at tig-₱75 milyon para sa Bogo City, San Remigio, at Medellin bilang bahagi ng Local Government Support Fund.
Sa ngayon, nakatuon ang pamahalaan sa mabilis na pagbibigay ng tulong pinansyal at medikal para matulungan ang mga nasalanta ng lindol at bagyo.
