Ang Bagyong “Paolo” ay bahagyang lumakas habang papalapit sa hilagang Luzon ngayong Huwebes, Oktubre 2, 2025. Itinaas na ang Signal No. 2 sa ilang bahagi ng Isabela, Quirino, at Aurora, ayon sa PAGASA.
Ayon sa 11 a.m. bulletin, huling namataan si Paolo sa layong 575 kilometro silangan ng Infanta, Quezon. Kumilos ito pa-kanluran hilagang-kanluran sa bilis na 20 kph, may dalang 75 kph na lakas ng hangin at 90 kph na pagbugso.
Signal No. 2 (inaasahang malalakas na hangin sa loob ng 24 oras) ay nakataas sa timog-silangang bahagi ng Isabela, hilagang bahagi ng Quirino, at hilagang bahagi ng Aurora. Samantala, Signal No. 1 naman ang nakataas sa malaking bahagi ng Luzon kabilang ang Cagayan, Nueva Vizcaya, Benguet, Ilocos, Pangasinan, Nueva Ecija, Bulacan, Pampanga, Quezon, Camarines Norte, Camarines Sur at Catanduanes.
Inaasahan ang malalakas na ulan simula Biyernes, Oktubre 3, sa mga probinsyang apektado. Babala rin sa mga mangingisda dahil ang alon ay aabot mula 3 hanggang 6 metro sa baybayin ng Isabela, Cagayan, Aurora, Babuyan Islands, Polillo Islands, Catanduanes, Quezon, Camarines Norte at Camarines Sur. Pinapayuhan ang mga sasakyang-dagat na huwag munang pumalaot.
Posibleng mag-landfall si Paolo sa Timog Isabela o Hilagang Aurora sa Biyernes ng umaga. Ayon sa PAGASA, maaari pa itong lumakas bilang Severe Tropical Storm at itaas ang Signal No. 3. May posibilidad ding umabot ito sa typhoon category bago lumabas ng West Philippine Sea.
