Ang Catholic Educational Association of the Philippines (CEAP) ay tahasang nagbatikos sa mga alumni na nasangkot sa kasalukuyang korapsyon sa gobyerno. Ayon kay Fr. Karel San Juan, SJ, presidente ng CEAP, nakakahiya kung ang isang graduate ng Catholic school ay gumagawa ng kabaligtaran sa values na itinuro sa kanila.
Binanggit ni San Juan na ang CEAP convention ngayong taon ay isang mensahe sa milyon-milyong alumni: ipakita ang integridad, katotohanan, at social justice sa kahit anong propesyon. Hinimok niya ang mga alumni na muling balikan ang mga values ng katotohanan at decency.
Ayon kay Narcy Dionisio, executive director ng CEAP, ang pagtanggal ng ethics subjects sa kolehiyo ay hindi tamang hakbang. “Ang ethics ay hindi opsyonal. Mahalagang ituro ito para maiwasan ang katiwalian sa lipunan,” dagdag niya.
Pinaalalahanan rin ni Fr. Wilmer Tria, CEAP Vice President, na ang korapsyon mismo ay ugat ng problema sa edukasyon sa bansa. Marami na raw “ghost” phenomena—mula sa ghost voters hanggang ghost projects—dahil sa patay na konsensya ng lipunan. Hinimok niya ang mga ahensya at korte na kumilos agad, ipataw ang parusa, at gawing publiko ang kaso ng korapsyon.
Sa kabila nito, ipinagmamalaki ng CEAP ang mga alumni na nanatiling tapat at mapaglingkod, tulad ng mga doktor, guro, abogado, at lider ng gobyerno, na nagtataguyod ng kaunlaran at malasakit sa mahihirap.
