Ang aktres na si Chie Filomeno ay nanawagan sa publiko na tigilan na ang pagkalat ng mga tsismis tungkol sa kanyang personal na buhay. Lumabas ang mga balita tungkol sa diumano’y hiwalayan nila ni Jake Cuenca at mga spekulasyon na iniuugnay siya sa isang negosyante mula sa kilalang pamilya.
Sa kanyang social media post, sinabi ni Chie: “Matagal ko nang nababasa at naririnig ang mga balitang ito. Hinihiling ko na huwag nang idamay ang nakaraan kong relasyon, ang kasalukuyan kong buhay, at ang pamilya ng negosyante dahil wala silang kinalaman dito.”
Dagdag pa niya, nais niyang ipaalala sa lahat na itigil na ang panghuhusga at pang-iintriga. “Wala na akong ibang pahayag. Nais ko lang ng pag-unawa at respeto mula sa lahat. Oo, artista ako pero hindi ako pag-aari ng publiko. Sana manatiling pribado ang aking personal na buhay,” pahayag niya.
Noong Agosto 2023, kinumpirma ni Chie na nakikipag-date siya kay Jake. Aniya, “Maganda kay Jake dahil alam niya ang priorities ko at hindi niya ako minamadali.” Samantala, sa isang panayam noong 2024, inilarawan naman ni Jake si Chie bilang kanyang TOTGA (The One That Got Away) at ibinunyag na dati na silang nag-date bago pa man muling nagkaroon ng relasyon.
Gayunman, ayon kay Jake, hindi nagkatuluyan noon dahil abala pa siya sa iba’t ibang bagay sa kanyang buhay. “Noon, mas wild pa ako. Pero ngayon mas balanse na ako at mas maayos. Akala ko noon perfect na ang timing, pero ngayon mas tama,” aniya.
