Ang beteranong guard na si Terrence Romeo ay muling babalik sa 3x3 basketball matapos ang 10 taon. Siya ay maglalaro para sa Manila Melmac sa darating na FIBA 3x3 Manila Challenger na gaganapin sa Setyembre 20-21 sa Parañaque.
Noong umpisa ng kanyang career, nakilala si Romeo sa halfcourt game at huling naglaro sa 3x3 noong 2015 para sa Manila West. Ayon sa kanya, pumayag siyang sumabak muli sa torneo bilang suporta sa bayan. “Kung para sa bayan, maglalaro ako. Hindi ko kailangan ng kahit anong offer, basta kailangan ako, andiyan ako,” sabi ni Romeo.
Makakasama ni Romeo sina Mac Tallo, Abdul Sawat, at Henry Iloka, habang si Chico Lanete naman ang magiging coach ng koponan. Ipinangako ni Romeo na gagawin niya ang lahat upang makatulong sa team. “Asahan ng fans na ibibigay ko ang best ko para makuha namin ang goal,” dagdag pa niya.
Si Romeo, na 33 taong gulang, ay tatlong beses nang naging PBA champion. Huli siyang naglaro para sa TerraFirma Dyip, ngunit natapos ang kanyang kontrata nitong Agosto. Inamin niya rin na bukas pa rin siya sa mga bagong oportunidad para sa susunod na yugto ng kanyang basketball career.
