Ang isang technician ng Meralco ay patay matapos pagbabarilin habang bumibiyahe sa Barangay Salitran 3, Dasmariñas, Cavite nitong Miyerkoles ng umaga. Galing pa ang biktima sa kanilang district office at binabaybay ang Jose Abad Road nang bigla siyang gitgitin ng isang sasakyan. Makikita sa CCTV na nagkaroon ng saglit na usapan bago siya binaril.
Dinala pa ang biktima sa ospital at na-revive ng mga doktor, pero kalaunan ay idineklarang patay. Sa imbestigasyon, may nakita sa van ng biktima na dalawang tama ng bala. Ayon sa mga nakarinig, may dalawa hanggang tatlong putok na pinaputok at may isang basyo ng bala na narekober.
Sa ngayon, tinitingnan ng pulisya na road rage ang motibo. Mayroon na silang person of interest na umano’y bodyguard ng isang politiko at residente rin ng Dasmariñas. Patuloy ang operasyon para mahuli ang suspek.
Nagpahayag naman ng pakikiramay ang Meralco sa pamilya ng kanilang empleyado na nagsilbi ng 21 taon sa kumpanya. Nangako rin silang magbibigay ng pinansyal na tulong at suporta sa pamilya, kabilang na ang pag-aasikaso ng burial at funeral arrangements na aabot sa ₱250,000 halaga.
Ang trahedya ay nagdulot ng matinding lungkot sa mga kasamahan ng biktima at ngayon ay umaasa silang makakamit nito ang hustisya.