Ang dalawang hinihinalang Korean national ay napatay matapos silang barilin at nakawan ng riding-in-tandem sa Malate, Maynila nitong Biyernes ng gabi, Agosto 15.
Ayon sa ulat ng Manila Police District-Homicide Section, ang mga biktima ay walang dalang ID. Isa sa kanila ay tinatayang nasa 30-35 anyos, may taas na 5’5, naka-itim na t-shirt, itim na shorts, may tattoo ng dragon sa likod, at naka-itim na sapatos. Ang isa pa ay nasa 25-20 anyos, may taas na 5’4, naka-green t-shirt, puting shorts, at sapatos.
Naganap ang insidente bandang 10:40 ng gabi sa Malvar Street, tapat ng isang hotel sa Barangay 699, Malate. Ayon sa mga saksi at CCTV, bumaba ng taxi ang mga biktima kasama ang isang tour guide nang biglang lapitan ng dalawang suspek sakay ng SkyDrive motorsiklo na kulay asul at puti. Isa ang humablot ng sling bag na may lamang pera, cellphone, at gamit, habang ang isa ay walang habas na nagpaputok ng baril.
Agad rumesponde ang mga pulis na nakatalaga sa lugar ngunit naabutan nang wala nang buhay ang dalawang biktima na nakahandusay sa kalsada. Patuloy pa ang imbestigasyon upang makilala at mahuli ang mga salarin.
