Ang isang food delivery rider sa Barangay Unang Sigaw, Quezon City ay hinoldap at ninakawan ng motorsiklo madaling-araw nitong linggo.
Makikita sa CCTV ang tatlong lalaki na humarang at nagpababa sa rider. Pinilit siyang ibaba sa motor habang tinutukan sa tagiliran. Nang makuha ang motor, mabilis silang tumakas patungong EDSA Monumento.
Bukod sa motorsiklo, tinangay din ang cellphone at ₱5,000 na pambayad sana sa renta ng bahay. Ayon sa kaanak, anim na taon nang food rider ang biktima at hinuhulugan pa niya ang motor sa loob ng isa’t kalahating taon.
Dahil sa insidente, nagdoble ang bantay ng mga tanod sa lugar. Payo ng barangay sa mga rider at residente na maging mas maingat lalo na kapag dis-oras ng gabi.
Nakikipag-ugnayan na ang biktima at barangay sa pulisya para makilala at mahuli ang mga suspek.
