Ang Korte Suprema (SC) ay nagpasya nitong Agosto 15 na suportahan ang subpoena ng Senado laban kay dating Bamban Mayor Alice Guo, na inuugnay sa POGO at espiya ng Tsina.
Humiling si Guo na ipawalang-bisa ang subpoena ng Senate Committee on Women matapos siyang hindi sumipot sa mga pagdinig. Giit niya, nilabag nito ang kanyang karapatan sa due process at privacy.
Ngunit sinabi ng SC na tama ang proseso ng Senado at hindi naapektuhan ang karapatan ni Guo. Dagdag pa, ang imbestigasyon ay bahagi ng kapangyarihan ng Senado para protektahan ang interes ng publiko at igalang ang batas.
Nilinaw din ng SC na bilang opisyal ng gobyerno, limitado ang privacy ni Guo lalo na kung usapin ay may kinalaman sa pambansang seguridad. Pinagtibay din na may kapangyarihan ang Senado na magpataw ng contempt dahil sa pagtakas ni Guo sa bansa at pagtanggi niyang sumagot sa simpleng tanong.
Malugod na tinanggap ng Sen. Risa Hontiveros ang desisyon. Ayon sa kanya, pinatibay nito ang kakayahan ng Senado na maghanap ng katotohanan at gumawa ng mga polisiya para protektahan ang soberenya ng bansa.
