Ang mga senador ay nanawagan ng mas mahigpit na regulasyon sa online gambling, dahil kahit may mga bagong limitasyon, posibleng makahanap pa rin ng paraan ang mga operator para makapasok gamit ang e-wallet services.
Ayon kay Sen. Sherwin Gatchalian, kailangan tiyakin ng gaming regulator at Bangko Sentral na tuloy-tuloy at buo ang pagpapatupad ng utos na ihiwalay ang mga e-wallet sa mga gambling sites. “Hindi ito simpleng regulasyon lang; tungkulin ng gobyerno na protektahan ang bawat Pilipino laban sa bisyo na sumisira sa pamilya,” aniya.
Samantala, si Sen. Bam Aquino ay natuwa sa utos na alisin ang koneksyon ng e-wallets sa e-gambling, ngunit naninindigan siyang dapat may total ban. “Kung mangyari ito, siguradong hihina ang online gambling industry sa Pilipinas. Pero ang talagang hinahanap namin ay kumpletong pagbabawal,” ani Aquino.
Binigyan ng 48 oras ang mga e-wallet companies para alisin ang icons at links papunta sa mga gambling platforms. Sabi ni Aquino, may double standard sa patakaran—bawal ang mga pasugalan sa loob ng 300 metro mula sa paaralan at simbahan, pero pinapayagan ang mga mobile gambling apps na halos nasa bulsa ng bawat tao.
Maraming senador, kabilang si Juan Miguel Zubiri, ang sumusuporta sa panawagang ito matapos ilahad ang negatibong epekto ng online gambling sa mga pamilyang Pilipino.
