Ang isang misis na si Chanda, residente ng Brgy. Cagbatang, Cataingan, Masbate, ay natagpuang patay, hubad, at sinunog sa isang liblib na lugar sa Sitio Busay, Brgy. Pawican noong Biyernes ng hapon. Lumabas siya ng bahay noong Miyerkules ng umaga sakay ng kanyang motorsiklo para mag-remit ng pera sa kanilang lending company pero hindi na siya nakauwi.
Kinagabihan ay nagsimula nang mag-alala ang kanyang mga kaanak dahil hindi siya umuwi. Makalipas ang ilang araw, nakita ng mga residente ang motorsiklo ni Chanda sa tabi ng kalsada ng barangay.
Makalipas ang ilang oras, nadiskubre ang kanyang walang saplot na bangkay na may mga sugat sa katawan. Pinaniniwalaang siya ay pinatay at sinunog para maitago ang krimen. May hinala rin na siya ay ginahasa bago pinaslang.
Ayon sa pulisya, iniimbestigahan nila kung holdap ang motibo ng suspek dahil may dala umanong pera ang biktima at posibleng nanlaban siya.
Isinailalim sa autopsy ang katawan ni Chanda para malaman ang totoong dahilan ng kanyang pagkamatay at kung totoong biktima siya ng panggagahasa. Patuloy ang imbestigasyon para matukoy ang may sala.
