Ang Philippine Airlines (PAL) ay magdadala ng unang Airbus A350-1000 sa bansa ngayong huling bahagi ng 2025. Kasalukuyang ginagawa ang eroplano sa Toulouse, France, at inaasahang makakarating ito sa Pilipinas bago matapos ang taon.
Kaya ng A350-1000 na bumiyahe ng hanggang 16,100 kilometro at magsakay ng 382 pasahero. Gagamitin ito ng PAL para sa kanilang mga long-haul flights tulad ng mga biyahe papuntang Amerika at iba pang malalayong bansa.
Ayon kay Atty. Carlos Luis Fernandez, Executive VP at COO ng PAL, pinili nila ang A350-1000 dahil sa kakayahan nitong mag-adjust sa dami ng pasahero at demand. Dagdag pa niya, mahalaga ang bagong eroplano para sa paglago ng PAL sa rehiyon at buong mundo.
Simula 2026 hanggang 2028, inaasahang makakatanggap pa ang PAL ng walo pang A350-1000, pati na rin ng 13 bagong A321neo para sa mga regional flights.
Sa kabila ng bahagyang pagbaba ng kita ngayong taon, nananatiling mataas ang demand sa pagbiyahe, ayon kay Captain Stanley K. Ng. Naniniwala ang PAL na mananatiling maganda ang takbo ng negosyo sa mga susunod na buwan.
