Ang isang vlogger ay posibleng makasuhan matapos siyang makitang pumasok sa chest freezer ng isang convenience store. Ayon sa Alfamart, seryoso nilang tinitingnan ang insidente at nagsagawa na sila ng imbestigasyon.
Ayon sa pahayag ng kompanya sa Facebook noong Hunyo 20, hindi pinapayagan ang ganitong klase ng gamit ng store equipment. Anila, maaari itong maging mapanganib at nakakaapekto sa reputasyon ng kanilang brand. Naghahanda na silang magsampa ng legal na aksyon laban sa sangkot.
Nag-viral sa social media ang video kung saan makikitang nakahiga ang vlogger sa loob ng freezer habang nakangiti, nakapaa, at tila ginagawang katatawanan ang sitwasyon. Sabi ng Alfamart, agad silang kumilos, tinanggal ang lahat ng yelo, at nilinis ang freezer bago muling maglagay ng bagong produkto.
Noong Hunyo 22, kinilala ng babae ang sarili gamit ang isang bagong account. Humingi siya ng public apology sa Alfamart, mga customer nito, at sa mga taong naapektuhan sa ginawa niya. Giit niya, wala siyang intensyong labagin ang sanitation rules, at layunin lang niyang magpatawa.
Dagdag pa niya, sana raw ay magkaroon din ng parehong energy ang mga tao sa mas seryosong isyu tulad ng pagtaas ng sahod ng mga manggagawa. Gayunpaman, binigyang-diin ng kompanya na patuloy nilang ipaglalaban ang kalinisan at kaligtasan para sa kanilang mga customer.
