Ang isang 54-anyos na lolo na nasawi sa aksidente sa NLEX noong Hunyo 18 ay naisalba pa ang kanyang 2 taong gulang na apo. Ayon sa pulisya ng Marilao, nang tumama ang trailer truck sa ilalim ng Marilao Interchange Bridge, bumagsak ang girder sa isang sasakyan kung saan sakay ang pamilya ng biktima.
Sa gitna ng trahedya, niyakap ng lolo ang bata para mailigtas ito habang bumabaliktad ang kanilang sasakyan. Dahil dito, nakaligtas ang bata na bahagya lamang ang tinamong sugat.
Pito silang magkakapamilya mula Parañaque at patungo sana sa Baguio para bumisita sa mga kamag-anak. Apat sa anim na nakaligtas ay kasalukuyang nagpapagaling sa ospital.
Nakakulong ngayon ang 31-anyos na truck driver sa presinto at posibleng humarap sa kasong reckless imprudence resulting in homicide. Ayon sa kanya, handa siyang managot sa nangyari.
Naglabas ng pahayag ang isang opisyal ng gobyerno na dapat ay managot ang NLEX sa pangyayari. Ito na raw ang pangalawang insidente sa parehong tulay, at may mga panukalang libreng toll sa mga apektadong bahagi ng daan habang inaayos ang sitwasyon.
