Ang mga Pilipino ay puwedeng bumiyahe sa Taiwan nang walang visa hanggang Hulyo 31, 2026. Inanunsyo ito ng Ministry of Foreign Affairs (MOFA) ng Taiwan noong Hunyo 14, 2025. Kasama rin sa extension ang mga turista mula Thailand at Brunei.
Layunin ng hakbang na ito na palakasin ang ugnayan ng Taiwan sa mga bansa sa Southeast Asia sa ilalim ng kanilang New Southbound Policy.
Kasama rin sa pinalawig ang Project for Simplifying Visa Regulations para sa mga high-end group tourists mula Southeast Asia hanggang Disyembre 31, 2026. Mananatili ring bukas ang Online Travel Authorization Certificate (TAC) para sa mga piling bansa sa rehiyon.
Ayon sa MOFA, gusto nilang dumami ang turista at mas mapalalim ang koneksyon ng rehiyon habang pinapanatili ang kaligtasan sa border at publiko.
Simula noong 2017, pinayagan na ang mga Pilipino na pumasok sa Taiwan nang visa-free ng hanggang 14 na araw. Dahil sa positibong resulta, ilang beses na itong na-renew, at ngayon ay pinalawig muli ng isa pang taon.
