Ang isang pickup truck ay nawalan ng kontrol at sumalpok sa waiting shed sa Brgy. Mabini Ilaya, Macalelon, Quezon nitong Miyerkules ng tanghali. Dahil dito, isang 54-anyos na tindera ang namatay, habang apat pa ang sugatan sa aksidente.
Ayon sa Macalelon police, ang nasawing tindera ay residente ng Brgy. Lawigue, Tayabas City. Agad namang dinala sa Gumaca Hospital ang mga sugatang biktima para sa paunang lunas. Maging ang driver ay kasalukuyang ginagamot matapos magtamo ng mga sugat sa katawan.
Base sa paunang imbestigasyon, ang 50-anyos na driver ay nawalan umano ng kontrol sa manibela habang tinatahak ang kurbadang bahagi ng kalsada papuntang Lucena City.
Bumagsak pa ang sasakyan sa malalim na bahagi ng kalsada, dahilan upang mas lumala ang pinsala sa mga biktima.
Rumesponde agad ang mga awtoridad sa lugar at patuloy pang iniimbestigahan ang sanhi ng aksidente.
