Ang Department of Health (DOH) ay magpapamahagi ng murang condom sa mga paaralan at workplace bilang tugon sa tumataas na bilang ng HIV cases sa Pilipinas. Ayon kay Health Secretary Ted Herbosa, layunin ng DOH na gawing mas accessible ang condom, lalo na sa mga kabataan, upang maiwasan ang unprotected sex.
Kasabay nito, nakikipagtulungan ang DOH sa Department of Education upang magtayo ng adolescent clinics sa mga pampublikong paaralan. May kasamang educational modules ang mga clinic na layuning turuan ang mga estudyante tungkol sa HIV at kung paano ito maiiwasan. Ayon kay Herbosa, may mga batang kasing-edad ng 12 taong gulang na tinamaan na ng HIV.
Dahil sa patuloy na pagtaas ng kaso, inirekomenda ni Herbosa na ideklara ni President Marcos ng isang national public health emergency. Aniya, tanging ang Pangulo lang ang may kapangyarihang utusan ang iba’t ibang ahensya para mas mabilis ang aksyon.
May babala rin ang mga opisyal tungkol sa muling paglitaw ng monkeypox o mpox. Nanawagan si Sen. Sherwin Gatchalian sa mga paaralan na paigtingin ang kalinisan at health protocols para sa darating na pasukan. Suportado rin ito ni Rep. Wilbert Lee na nananawagang muling buhayin ang national task force laban sa mpox.
Pinaalalahanan ng mga opisyal ang publiko na sakop na ng PhilHealth ang mpox, kaya't may tulong-medikal para sa mga pasyenteng diagnosed.
