Ang isang lalaking bagong laya mula sa Bilibid ay nahuli sa buy-bust operation sa Barangay San Juan, Taytay, Rizal noong gabi ng Miyerkules, June 4, 2025. Nakumpiska sa kanya ang P700,000 halaga ng shabu at isang baril na may bala.
Ayon sa pulisya, ang suspek ay nakalaya noong May 10, 2025 matapos makulong noong 2018 dahil sa droga at ilegal na baril. Sa loob pa lang ng kulungan, mayroon na umano siyang koneksyon sa mga supplier ng droga. Minanmanan siya ng dalawang linggo matapos makatanggap ng impormasyon ang mga pulis.
Sinabi ni Police Colonel Felipe Maraggun, na ang pinagkukunan ng droga ng suspek ay galing sa dati niyang kasama sa Bilibid na naunang nakalaya noong Abril.
Nakuha sa operasyon ang tatlong sachet ng shabu na tumitimbang ng 100 gramo, pati na rin ang baril na may bala. Ang suspek ay itinuturing na high-value individual sa droga.
Depensa ng suspek, hindi sa kanya ang mga nakuhang droga at baril. Umamin siyang dating gumagamit, ngunit hindi raw siya nagbebenta. Kasong droga, illegal firearms, at paglabag sa gun ban ang isasampa laban sa kanya.
