Ang mga mahihirap na pamilya ay may aasahang ginhawa matapos aprubahan ng Senado ang panukalang libreng serbisyong libing nitong Hunyo 2. Tinatawag itong Free Funeral Services Act o Senate Bill No. 2965, na layong tulungan ang mga pamilyang walang sapat na pera sa panahon ng pagdadalamhati.
Sa ilalim ng panukala, libre na ang mga pangunahing serbisyo sa libing gaya ng embalsamo, kabaong, cremation, inurnment, transportasyon, pati lugar ng libingan. Ang lahat ng ito ay ilalaan sa ilalim ng tinatawag na “Indigent Funeral Package.”
Ang mga pamilyang sakop ng programa ay iyong mga nasa ilalim ng poverty line, ayon sa batayan ng NEDA. Sakop din ang mga biktima ng kalamidad o biglaang sakuna, basta’t matukoy ng DSWD na wala silang kakayahang magbayad ng disenteng libing.
Maaaring mag-avail ang mga kwalipikadong pamilya sa kahit saang funeral establishment sa bansa basta’t ito ay accredited at sumusunod sa uniform na indigent funeral package.
Layunin ng panukalang ito na maibsan ang gastusin sa oras ng pagkawala, at matiyak na may dignidad ang bawat pamamaalam—anumang estado sa buhay.
