Ang pagtatakip ng plaka ng motor ay isang kriminal na paglabag, ayon sa Land Transportation Office (LTO). Ginagamit ng ilan ang paper plates, packing tape, at kahit dahon para itago ang plaka at makaiwas sa No-Contact Apprehension Policy o NCAP. Ayon kay Greg Pua Jr., Executive Director ng LTO, ito ay labag sa Motorcycle Crime Prevention Act.
Pwedeng maharap sa multang hanggang ₱10,000 at pagkakakulong ng hanggang 2 taon ang sinumang mahuhuling gumagawa nito. Awtomatikong ipapaalam ng mga CCTV camera sa mga enforcer kapag may na-detect na tinakpan na plaka.
Ayon sa MMDA, walang exemption ang sinuman. Bawat motorista na ma-isyuhan ng show-cause order ay may karapatang magpaliwanag sa legal na proseso. Napag-alaman ng MMDA na higit sa 50 motorista na ang sumubok takpan ang kanilang plaka, karamihan ay mga motorcycle rider.
Patuloy ang implementasyon ng NCAP sa kabila ng EDSA rehab suspension. Ayon sa MMDA, utos mula sa Supreme Court ang pagbabalik ng polisiya. Bukod sa disiplina sa kalsada, nakatulong din daw ito sa mas maayos na daloy ng trapiko.
Sa kabila ng mas mababang bilang ng violation, nananatiling problema ang illegal parking, obstruction, at paglabag sa traffic signs. Paalala ng mga awtoridad: mas ligtas at mas maayos ang kalsada kung susunod sa batas trapiko.
