Ang Philippine National Police ay nagsagawa ng raid sa isang gusali sa San Roque, Antipolo City, Rizal noong Mayo 27. Ayon sa ulat ng pulisya, 70 katao at isang menor de edad ang nahuli sa operasyon laban sa isang online investment scam.
Pinangunahan ng PNP Anti-Cybercrime Group (PNP-ACG) ang raid, kasama ang Securities and Exchange Commission (SEC), Rizal PPO, at Antipolo City Police Office. Ginamit nila ang search at seizure warrant laban sa may-ari ng gusali na kinilalang si "Arthur."
Matagal nang minamanmanan ang opisina mula pa noong 2024 matapos mag-report ang isang Australian national na may panloloko sa mga banyagang investor. Kabilang sa mga nakumpiska ay mga computer at electronic devices para sa digital forensic analysis.
Sinusuri pa kung may kaugnayan sa human trafficking at illegal na pagtatrabaho ng menor de edad ang operasyon. Patuloy ang imbestigasyon para malaman ang iba pang sangkot.
