Ang National Bureau of Investigation (NBI), kasama ang Department of Trade and Industry (DTI) at Bureau of Internal Revenue (BIR), ay nasabat ang P63 milyong halaga ng mga ilegal na vape products sa magkakahiwalay na operasyon sa Bulacan, Parañaque City, at Pasay City. May kabuuang 179,000 piraso ng vape at accessories ang nakumpiska mula sa mga target na lugar.
Ayon kay Atty. Van Homer Angluben ng NBI-Cybercrime Division, unang isinagawa ang operasyon sa bisa ng mission order, habang ang sumunod ay buy-bust operations. Napag-alamang ibinebenta ang mga vape sa pamamagitan ng online messaging apps, at ang bayad ay ginagawa gamit ang cryptocurrency o casino chips, upang iwasan ang pisikal na pera.
Tatlong dayuhan at dalawang Pilipinong empleyado ang naaresto sa operasyon. Ang mga dayuhan ay sinasabing may-ari ng bodega at mga middleman ng isang Chinese supplier, habang ang mga Pinoy ay tagahanap ng mga mamimili online.
Malaking epekto umano ang hatid ng mga puslit na produkto sa kita ng gobyerno at kalusugan ng publiko. Ayon sa NBI, doble ang halaga ng excise tax kumpara sa presyo ng vape products kaya malaki ang nalulugi sa buwis. Bukod pa rito, walang kasiguraduhan sa kalidad ng mga produktong ito na posibleng makasama sa kalusugan ng konsyumer.
Nahaharap ang mga suspek sa kaso ng paglabag sa Republic Act No. 11900, na naglalayong ayusin ang pagbebenta ng vaporized nicotine at non-nicotine products, pati na rin sa Tax Reform Act. Tumanggi silang magbigay ng pahayag habang nagpapatuloy ang imbestigasyon.
