Ang litrato ng isang taong lumabas mula sa kanal sa Makati City ay mabilis na kumalat sa social media. Nakuhanan ito ni William Roberts, habang naglalakad sa kanto ng VA Rufino at Adelantado Streets, Barangay San Lorenzo. Ayon sa kanya, nakita niyang lumabas ang ulo ng tao mula sa takip ng kanal at agad itong tumakbo palayo.
Dahil sa viral na post, sinementuhan agad ng awtoridad ang kanal para masigurong walang ibang makakapasok o makakalabas doon. Rumesponde agad ang pulisya at nagsagawa ng imbestigasyon. Pumasok sa kanal ang IDMS Tracker Team at nakuha ang ilang gamit tulad ng tela at bakal.
Natukoy na palaboy ang taong lumabas sa kanal. Pinaniniwalaang doon ito naninirahan tuwing gabi. Nakipag-ugnayan na ang pulisya sa DSWD at barangay para matulungan ang tao at mailigtas ito sa panganib.
Nag-coordinate na rin ang mga otoridad sa Makati Commercial Estate Association para masigurong ligtas ang paligid. Pinagbabantayan na ngayon ng mga pulis ang lugar para mapanatili ang kaayusan at seguridad.
Ang ganitong insidente ay paalala sa kahalagahan ng seguridad at pagtulong sa mga nangangailangan, lalo na sa mga walang tirahan sa siyudad.
