Ang tatlong magkakapatid sa Oviedo, Spain ay nasagip mula sa bahay kung saan sila ikinulong ng kanilang mga magulang simula pa noong 2021, sa kasagsagan ng COVID-19 pandemic. Pinilit silang magsuot ng face mask at hindi lumabas ng bahay sa loob ng halos apat na taon.
Ayon sa local media tulad ng El Comercio, El Mundo, at ABC, ang mga bata—8-year-old na kambal at isang 10-taong-gulang—ay nakalabas sa wakas noong nakaraang linggo. Bagama’t hindi sila gutom, sabi ng awtoridad na sila ay madudumi at parang walang alam sa tunay na mundo.
Isa sa mga investigators ang nagsabi na nung mailabas ang mga bata, "huminga sila ng malalim na parang ngayon lang nakalanghap ng hangin sa labas." Na-excite din sila sa simpleng bagay tulad ng paghawak sa damo.
“Sobrang nakaka-shock ang kondisyon nila,” ayon sa source mula sa El Mundo. “Nung inilabas namin sila sa garden, nakakita lang ng snail, todo tuwa na sila.”
Ang kapitbahay ang nag-report noong April 14 matapos mapansin na hindi pumapasok sa school ang mga bata. Dahil dito, nagsagawa ng imbestigasyon ang mga pulis. Naaresto ang mga magulang at nahaharap ngayon sa kaso ng domestic violence at child abandonment.
