Nasamsam ng Philippine Drug Enforcement Agency (PDEA) at Philippine National Police (PNP) ang tinatayang ₱6.6 bilyong halaga ng shabu mula sa isang clandestine laboratory na nadiskubre sa loob ng warehouse sa Barangay Veinte Reales, Valenzuela City. Sa isinagawang joint operation, narekober ang higit 906 kilo ng shabu na may halagang humigit-kumulang ₱6.16 bilyon, pati na ang mahigit 64 litro ng liquid methamphetamine na tinatayang nagkakahalaga ng ₱436 milyon. Bagama’t walang naaresto sa mismong raid, kinumpirma ng mga awtoridad na may mga natukoy nang personalidad na kasalukuyang pinaghahanap.
Ayon sa imbestigasyon, natunton ang laboratoryo matapos ang isang buy-bust operation kung saan isang high-value individual ang naaresto. Sa pagtakas umano ng suspek patungo sa warehouse, nagsagawa ng hot pursuit ang mga operatiba na nagbunga ng pagkakatuklas sa pasilidad. Matagal na umanong mino-monitor ng PDEA ang target at napansing madalas itong bumibisita sa naturang lokasyon, na nagpatibay sa hinalang may ilegal na operasyon sa lugar.
Kinumpirma ni Isagani Nerez, Director General ng PDEA, na posibleng konektado ang nasabing laboratoryo sa naunang na-raid na pasilidad sa Binangonan, Rizal. Dagdag pa ng opisyal, karaniwan umanong iniiwan ng mga sindikato ang kanilang mga laboratoryo kapag nararamdaman nilang papalapit na ang mga awtoridad. Samantala, sinabi ni Elmer Ragay, hepe ng PNP Drug Enforcement Group, na may naisampa nang mga kaso at nagpapatuloy ang masusing manhunt laban sa iba pang sangkot.
Narekober din sa loob ng warehouse ang mga controlled precursors, essential chemicals, at laboratory equipment na ginagamit sa paggawa ng ilegal na droga. Tinutukoy na ngayon ng PDEA ang pinagmulan ng mga kemikal na pinaniniwalaang may kaugnayan sa isang international drug syndicate. Nakipag-ugnayan na rin ang pamahalaang lungsod ng Valenzuela sa may-ari ng warehouse, na posibleng lumabag sa isang lokal na ordinansa kaugnay ng pagrerehistro at pagdedeklara ng mga umuupa at papasok na kargamento.
Aminado ang lokal na pamahalaan na mahirap bantayan ang tinatayang 15,000 warehouse at komersyal na establisyimento sa lungsod, ngunit tiniyak na paiigtingin ang inspeksyon at monitoring upang maiwasan ang kahalintulad na insidente. Patuloy ang imbestigasyon sa mga ruta ng transportasyon, lokal na kontak, at supply chain ng sindikato. Ang mga nakumpiskang ilegal na droga ay nakatakdang sirain alinsunod sa umiiral na mga patakaran ng PDEA habang nagpapatuloy ang operasyon laban sa mga responsable.
