Ang tennis star Alex Eala at volleyball standout Bryan Bagunas ang napiling flag-bearers ng Pilipinas para sa opening ceremony ng 33rd SEA Games sa Thailand. Inanunsyo ito ng POC President Abraham “Bambol” Tolentino, na pinuri ang malaking epekto ng dalawang atleta sa sports world.
Ayon kay Tolentino, hindi lang sikat ang dalawa, kundi tunay na may malaking ambag sa global sports community. Dahil dito, sila ang isa sa pinakamagandang pagpili para buhatin ang bandila ng Pilipinas sa pag-opening ng SEA Games sa December 9 sa Bangkok.
Galing sa malakas na taon si Eala, matapos tapusin ang WTA season bilang world No. 50. Si Bagunas naman ang team captain ng Alas Pilipinas men’s volleyball team na nagkaroon ng makasaysayang run sa FIVB World Championship na ginanap sa bansa.
Binibigyang-diin ni Tolentino na ang mga atletang may inspirational appeal, sipag, at motibasyon ang mas pinipiling flag-bearers, lalo na yung nagbibigay-inspirasyon sa kabataang Pilipino.
Ibinahagi rin niya na may 300-member delegation na nakalaan para sa Pilipinas sa parade, pero maaaring bawasan sa 200 dahil sa year-long mourning para kay Queen Sirikit at sa Songkhla disaster. Nasa 1,700 athletes ang ilalaban ng bansa sa kabuuang 574 events sa 50 sports, na gaganapin sa Bangkok at Chonburi matapos kanselahin ang Songkhla dahil sa malawakang pagbaha.
