Ang walong taong gulang na batang babae ay kasalukuyang kritikal matapos matagpuang bugbog-sarado at walang saplot sa Mabalacat City, Pampanga. Kinilala ang biktima bilang si "Amy," residente rin ng naturang lugar.
Ayon sa pulisya, naiulat na nawawala si Amy noong Oktubre 19 matapos hindi makauwi sa kanilang bahay. Sa tulong ng barangay, nakuha sa CCTV na huling nakita ang bata sa isang internet shop habang pinapanood ang ibang batang naglalaro. Isang lalaki ang lumapit, tinapik siya sa balikat, at sumama ito sa kanya kapalit ng ₱20.
Kinilala ng awtoridad ang suspek na si “Christian,” 20 taong gulang, isang helper at nakatira rin sa parehong barangay. Inamin umano niya na dinala ang bata sa isang liblib na lugar malapit sa North Luzon Expressway (NLEX), kung saan siya natagpuang halos walang malay at may matitinding sugat.
Batay sa medical report, nagtamo si Amy ng malubhang pinsala sa ulo at katawan matapos tamaan ng bato. Kumpirmado rin ng pulisya na biktima siya ng panghahalay.
Arestado na ang suspek sa tulong ng mga Barangay Bantay Bayan volunteers at nahaharap ngayon sa kasong statutory rape at frustrated murder. Patuloy na ginagamot si Amy sa ospital habang nananawagan ang kanyang pamilya ng hustisya.
