Ang huling episode ng Pinoy adaptation ng It’s Okay to Not Be Okay ay nagbigay ng halo-halong emosyon ng lungkot at saya para sa mga manonood. Naging inspirasyon ang serye at nagbigay ng pag-asa at healing hindi lang sa fans kundi pati sa mismong cast.
Ang healing trio — Anne Curtis bilang Mia, Joshua Garcia bilang Patrick, at Carlo Aquino bilang Matthew — nagbahagi ng kanilang pasasalamat. Ayon kay Anne, naging makabuluhan ang bawat karakter at may aral na naibigay sa lahat. Si Joshua naman inamin na mahirap bitawan ang karakter niya. Si Carlo ay masaya dahil nagkaroon siya ng bagong “pamilya at foundation” sa show kahit mahirap magpaalam.
Nagpasalamat din ang cast sa mga directors, crew, at staff. Ayon kay Carlo, kahit mahirap ang taping, nabuo pa rin ang matibay na bonding. Si Joshua ay hindi makakalimutan ang kanilang videoke nights. Dagdag pa ni Anne, mamimiss niya ang lahat ng naging bahagi ng journey na ito.
Sa kanilang huling mensahe, buong puso silang nagpasalamat sa mga fans. “Mahal namin kayo,” ani Joshua. “Thank you,” dagdag ni Carlo. Habang si Anne ay nag-iwan ng mensahe: “We hope na naibigay namin sa inyo ang parehong feels ng original. At tandaan, It’s okay to not be okay.”
