Ang Meta ay magsisimulang gamitin ang mga usapan ng tao sa kanilang AI chatbot para i-personalize ang ads at content sa Facebook at Instagram. Inanunsyo ito ng kumpanya nitong Miyerkules.
Simula Oktubre 7, makakatanggap ang mga users ng notification tungkol sa pagbabagong ito, at magiging epektibo ito sa Disyembre 16, 2025. Gagamitin ng Meta ang interactions sa AI – sa voice o text – katulad ng paraan ng pag-track nila sa likes, shares, at posts para malaman ang interes ng users at kung anong ads ang pinakaakma.
Halimbawa, kung pag-uusapan mo ang outdoor activities sa AI, maaaring makakita ka ng mga rekomendasyon para sa hiking groups, posts tungkol sa trails mula sa kaibigan, o ads ng hiking equipment.
Meta sinabi na hindi gagamitin ang mga pag-uusap tungkol sa sensitibong paksa tulad ng relihiyon, sexual orientation, pulitika, at kalusugan para sa ad targeting. May kontrol din ang users kung gaano ka-personalized ang ads at content na makikita nila.
Gagamitin din ang AI interactions sa WhatsApp accounts na konektado sa Meta account ng users para sa personalization. Simula ng rollout, karamihan ng regions ay makakaranas agad ng update, habang ang Europe at UK ay susunod dahil sa mas striktong privacy regulation.
